Canguk, Kali Tanjung

🌷🌷ALAM LELEMBUT.🌷🌷
🌷Canguk, Kali Tanjung 🌷

- Canguk..?
Miturut ujare crita Canguk iki bangsane lelembut sing biyasane manggon neng
kali wujude gedhe dhuwur kurang luwih watara telung meter.

Nanging dheweke seneng tetulung marang wong sing seneng mancing neng cedhak
omahe .

Nanging senajan kaya ngapa jenenge dhemit kanggone manungsa tetep medeni.

Crita iki dilakoni dening sedulurku kepernah tuwa sing tak sebut wae
jenenge Mas Karno.

Dheweke seneng banget mancing ana kali.

Wektu iku iwak daging sapi utawa wedhus cukup larang mula sing dianggep
murah lan enak mung iwak kali.

Kali Tanjung iku kali sing nyigar kuthaku ing tlatah Jawa wetan.

Mlebu ngliwati desa-desa lan ing desa Tanjung ana bendungan sing kanggo
ngatur irigasi supaya banyune bisa dipigunakake dening kadang tani.

Dene Canguk kuwi bangsane lelembut sing dianggep dadi tukang angon iwak
banyu utamane kali…

Mula saben kali sing akeh iwak e biyasane dipanggoni bangsane lelembut sing
disebut Canguk mau.

Gandheng karepe wis notol ora bisa disemayani wiwit sore Mas Karno wis nata
walesan ora lali umpan sing jarene dianggep paling joos.

Watara jam pitu bengi wis mlaku nuju kali sing cedhak karo bendungan.

sawise golek panggonan sing kepenak neng ngisor wit Nangka doyong sing
papane rada omber.

Dheweke wiwit masang umpan karo nyumet rokok klembak utawa rokok lisong
sing ambune nduleg irung.. kaya wong ngobong menyan.

Miturut dheweke rokok klembak kuwi uga kanggo ngundang sing mbaureksa kali
ben ngrewangi golek iwak .

terus umpan diuncalake neng banyu sing mili anteng…

Jam sing sepisanan mung narik iwak cilik - cilik sabangsane wader. …
Karo nyumet rokoke klembak Mas Karno nggremeng dhewe. ..

:" Asem… iwak kok cilik-cilik thok sing gedhe dha mlayu neng ndi ae….

Angin wengi sing semribit nggawa hawa anyes ora dirasakake.

Ora suwe ndadak mak nyut.. pancinge digondhol nganti dheweke meh wae
kecemplung kali. …

Rebut kuwat karo iwak wekasan bisa mentas iwak Kutuk sing gedhe …

Mengkono sateruse Mas Karno ngentas iwak badher utawa kutuk.. nganti kepis
wadhah iwak kebak…
Watara jam rolas bengi dheweke leren…
Ndadak ana wangsulan mara..

:" Mas, nyuwun gramane. (Mas njaluk geni ne),"

Mas Karno disapa wong saka mburi.

Tanpa noleh, dheweke ngulungake korek marang wong mau.

Dheweke asyik nata iwak neng kepis supaya ringkes.

:" Matur nuwun nggih.," swarane wong mau ngucap matur nuwun karo nyenggol
githoke mas Karno.
Nyess adhem banget....

Nanging Mas Karno tetep ora noleh.
Bareng dheweke noleh weruh wong saumur dheweke uga lagi ngrokok klembak menyan.

:" Sampun angsal kathah kok mboten kondur,"

Tembunge wong lanang mau karo nyawang mas Karno.

Mas karno noleh dheweke kaget, bareng weruh wong mau awake saya gedhe medeni.

Mas Karno ethok-ethok ora nggagas karo nyawang arah gunung.

Nanging rasa penasaran lan ora percaya meksa dheweke noleh maneh.
"Canguk...!"

Aloke Mas Karno ora sadhar nyebut..

"Nggih mas....,"

Wangsulane wong mau glorok-glorok gedhe banget.
Ora nggagas maneh sakala mas Karno ngadeg nyat.. nyaut kepis wadhah iwak
sak pancinge mlayu ninggal Canguk mau.
Sandhal jepit sak rokoke kari ora dipikir.

Dheweke mlayu nganti tekan ngisor bambrongan pring mas Karno nabrak barang
empuk mak ganul anyes adhem….

Dheweke mundur sawatara jangkah…..
Nyawang barang sing ditabrak

:" Mboten usah mlajar.
Mboten usah ajrih, kula mboten ngganggu.
Sampeyan mpun kula rewangi namung kok sampeyan mboten matur nuwun….?"

swara lembut mau saka barang sing ditubruk mau jebul wetenge Canguk mau.
:" Bebbb bebb...beb
.Ooh..Oh.. nggih matur nuwun… matur nuwun,"

Wangsulane mas Karno karo glagepan campur wedi.

:" Nek butuh sampeyan mancing malih waton mboten didol. .."

Kandhane wewujudan mau.
Wiwit kuwi Mas Karno seneng mancing neng panggonan mau senajan rada wedi.

Wis ya drijiku kesel.
To be continue.

Sent with AquaMail for Android
https://www.mobisystems.com/aqua-mail